RAPPORT FRÅ STYRET I SOGN OG FJORDANE


Styret i Innovasjon Norge i Sogn og Fjordane vart oppnemnt i hovudstyret 18. mars 2004. Styret har halde åtte møter i 2005 og har handsama og protokollert 40 saker.

For å få innsyn i næringslivet og kommunane sine konkrete utfordringar legg styret stor vekt på å møte bedrifter og kommunar i deira eige miljø. Dette er grunnen til at nokre av styremøta vert lagt ut til distrikta også med innlagt bedriftsbesøk. Styret hadde møte i Jølster med vekt på landbruk og bygdenæringar og i Måløy der tema var fiskerisektoren. Det var også eit styremøte i Sogndal der vi hadde orienteringar og drøftingar med Vestlandsforsking, Høgskulen og Kunnskapsparken. Nokre møte har vore telefonmøte.

2005 har vore eit år med mykje fokus på omstilling for næringslivet i Sogn og Fjordane. Det er stilt store økonomiske ressursar til rådvelde i Høyanger og Årdal og styret har handsama fleire viktige saker i desse to kommunane, mellom anna etablering av Dooria Årdal. Innovasjon Norge har ansvar for å følgje opp og kvalitetssikre omstillingsarbeidet i Flora, Årdal og Høyanger

Styret har sett i gang eit stort internajsonaliseringsprosjekt i Sogn og Fjordane i 2005. Etter eit kort forprosjekt fram mot sommaren 2005 starta hovudprosjektet opp mot slutten av året. Prosjektet skal gå over tre år og har fokus på auka eksport frå Sogn og Fjordane.

Nasjonale styresmakter sette i gang ei større satsing på omstilling i mjølkeproduksjon frå og med 2005. Styret prioriterte stor delar av BU-midlane til etablering av totalt ni nye samdrifter med til saman 40 gardsbruk involvert.

Diskusjonar kring ulike former for regionalisering stod sentralt på mange dagsordenar i 2005. Alle styra i dei fire vestlandsfylka gav ei felles fråsegn til Vestlandsrådet si utgreiing om ny regionstruktur på Vestlandet. Styret gav også innspel til Innovasjon Norge sin uttale til NHD om framtidig regionalisering i Norge.

Styret i Innovasjon Norge i Sogn og Fjordane er samansett av fire kvinner og fire menn. 44 % av dei tilsette i administrasjonen er kvinner. Sjukefråværet i 2005 ved kontoret var på 6,1%.

Samarbeidet mellom styret og administrasjon er godt, og styret vil takke administrasjonen og tilsette for godt samarbeid og grundig førebudde saker.