INNOVASJON NORGE I SOGN OG FJORDANE
Også i 2005 har Innovasjon Norge i Sogn og Fjordane
arbeidd med prosjekt som har som formål å hjelpe fram
personar eller bedrifter med innovative idear. Det har
vore høg aktivitet med mange, spanande og utfordrane
prosjekt. Aktivitetane er knytt til Innovasjon Norge sine
satsingsområde og Sogn og Fjordane fylkeskommune sin
fylkesplan.
Entreprenørskap har hatt eit hovudfokus i Innovasjon Norge
i Sogn og Fjordane. Entreprenørskapsarbeid er av både
langsiktig og kortsiktig karakter. Det langsiktige
arbeidet handlar om å utvikla kultur, haldningar og
interesse for entreprenørskap, medan målsettinga ved det
kortsiktige arbeidet er å få auka talet vellukka
etableringar.
Vi har i 2005 gjennomført ei
rekkje eigne prosjekt som rettar seg mot entreprenørar som
mellom anna Fjord Innovasjon og Alkymisten.
Innovasjon Norge i Sogn og Fjordane har starta EXPO Sogn
og Fjordane, som er ei treårig satsing på
internasjonalisering retta mot bedrifter som vil satse på
eksport. I 2005 vart det gjennomført eit forprosjekt som
dannar grunnlag for det vidare.
Målet er at
deltakande bedrifter samla sett skal auke eksporten med 30
% i løpet av tre år.
Opplæringsprogrammet Internasjonal marknadsføring for
reiselivet vart gjennomført med tolv deltakande bedrifter.
Prosessen munna ut i ein marknadsplan for satsing på
utanlandske marknader og ein heilheitleg strategisk plan
for bedriftene.
Årdal, Høyanger og Flora er av fylkeskommunen definert som
omstillingskommunar, og det vart løyvd midlar til å
gjennomføre omtillingsprosessar i kommunane i 2005.
Innovasjon Norge har hatt ansvar for kvalitetssikring
gjennom å være rådgjevar, pådrivar og oppfølgjar av
omstillingsarbeidet.
2005 var designåret, og Innovasjon Norge i Sogn og
Fjordane har hatt eigen designsatsing i samarbeid med
Stryn Næringshage.
I arenaprosjektet MarinVEST har det vore arbeidd med
å etablere møteplassar for dei marine næringane i fylket
som skal fungere som ein arena for innovasjon og nytenking
på tvers av geografi og verdikjeder.
Det har vore fokus på å styrke deltaking av kvinner i
norsk næringsliv gjennom haldningsskapande arbeid,
styrekurs, nettverk og konferansar.
Gjennom Verdiskapingsprogrammet for Mat har det vore
arbeidd med lokal mat og mattradisjonar, frukt og
bærprosjekt og merkevarebygging.
Det har vore stor etterspurnad etter Innovasjon Norge sine
verkemiddel i 2005. Marine næringar er den bransjen det er
løyvd mest midlar til. Det er i hovudsak lån til
fiskeflåten i samband med den restrukturering av næringa
(kvotekjøp og samanslåing).
Ei rekkje mindre
og innovative tiltak retta mot industrinæringane er
støtta. Her har omstillingskommunane vore
prioriterte, og dei har fått til saman 45 % av
tilskotsmidlane som har gått til industrinæringa.
Når det gjeld BU-midlane har Innovasjon Norge
satsa spesielt på samdrifter i mjølkeproduksjon.
Elles har det vore løyvd mykje midlar til
fellesprosjekt som etableraropplæring,
internasjonalisering, design, regional omstilling,
SMB-utvikling, strategi, styreutvikling, leiarutvikling,
entreprenørskap, FRAM og kvinne/ungdomssatsing.
Innovasjon Norge Sogn og Fjordane har også hatt det
operative ansvar for Næringsretta utviklingstiltak
(kompensasjon for bortfall av differensiert
arbeidsgjevaravgift) for Fondsstyret i Sogn og Fjordane.
|