|
NÆRINGSLIVET I SOGN OG FJORDANE
Norsk økonomi har vore inne i ein
svært god utvikling i 2005 med optimisme både privat og i
næringslivet. Dette gjenspeglar seg også i Sogn og
Fjordane. Bedriftsleiarane i Sogn og Fjordane forventar ei
positiv marknadsutvikling i 2006. Framtidsutsiktene vert
vurdert som betre no enn for eit år sidan.
Ved inngangen av 2006 var arbeidsmarknaden prega av
minkande arbeidsløyse og aukande etterspurnad etter
arbeidskraft. Nedgangen i talet på heilt ledige i Sogn og
Fjordane var på heile 15 % samanlikna med 2004. Det er
særleg industri og bygg og anlegg som har bidrege med auka
etterspurnad etter arbeidskraft. Stadig fleire bedrifter
må ta i bruk utanlands arbeidskraft.
På grunn av det låge rentenivået har investeringane auka.
Dette gjeld spesielt innafor dei marine næringane og
industri som rettar seg mot eksport. Eksportindustrien er
gjennomgåande meir optimistisk med omsyn til omsetning og
lønnsemd.
2005 som 2004 har også vore
prega av auka fokus på omstilling av industrien i Sogn og
Fjordane. Dette gjeld i særleg grad i samband med
betydelege nedskaleringar av Hydro sin aktivitet i Årdal
og Høyanger. Situasjonen i Flora er betre på grunn av
oppgang i verftsnæringa, men det er likevel store
utfordringar på grunn av nedgang i offentlege
arbeidsplassar.
Fiskeriindustrien i fylket slit med overkapasitet og svak
lønsemd og hovudutfordringa er å betre lønsemda i
alle ledd i verdikjeda. Strukturendringar og samanslåing
av kvotar og fiskerettar har ført til færre og større
båtar samt konsentrasjon av fleire fiskerettar på færre
båtar. Det har vore ei positiv marknads- og
lønsemdsutvikling i fiskeri i 2005 og ein forventar at den
positive utviklinga vil vare ved.
Oppdrettarane i Sogn og Fjordane hadde ein
gjennomsnittleg driftsmargin på 11,1 % i 2005. Det er det
nest beste resultatet i landet.
Reiselivsnæringa opplevde betre lønnsemd i 2005 enn 2004,
mens tal på hotellovernattingar var på omtrent same nivå.
Hotella slit med låg kapasitetsutnytting, 43%, mens
landsgjennomsnittet var 53,1%. Ei stadig tettare
samhandling mellom reiseliv, landbruk, kultur og lokal mat
betyr eit stort potensial for auka aktivitet, ikkje minst
i eit fylke som Sogn og Fjordane. Nærøyfjorden vart
sommaren 2005 del av UNESCO sin World Heritage List, og
dette kjem til å trekkje fleire turistar til området.
Også i 2005 opplevde vi at det vart færre men større
aktive gardsbruk i fylket. Det er etablert fleire nye
samdrifter. Likevel har vi gjennomsnittleg dei minste
gardsbruka i landet. Samarbeid og nisjeproduksjonar gjev
optimisme i næringa og også bonden må omstillast til å
tenke marknad og kunne ta rolla som kommunikator for å
skape begeistring gjennom å formidle kultur, historie og
tradisjonar.
Sogn og Fjordane har ein relativ låg del sysselsette innan
tenesteytande næringar i høve resten av landet. Vi ser no
likevel framvekst av mange spanande bedrifter innan denne
sektoren og ein relativ stor andel av nyetableringar.
|