Rapport frå styret

Styret har halde ni møter i 2006 og handsama og protokollert 47 saker.

For å få innsyn i næringslivet og kommunane sine konkrete utfordringar legg styret stor vekt på å møte bedrifter og kommunar i deira eige miljø. Difor er nokre av styremøta lagt på forskjellige stader i fylket, og også med innlagt bedriftsbesøk.

Luster og Fjaler

Styret hadde eit møte i Årdal der det vart orientert om arbeidet med omstillingskommunane i fylket. Det var også lagt møter til Luster og Fjaler der styret fekk møte bedrifter som klarar seg godt trass lokalisering i utkantane.

Studietur til Polen

Det vart også arangert studietur til Polen. Der fekk styret møte norske bedrifter som hadde etablert seg i Polen. Styret var også på besøk hos Innovasjon Norge sitt kontor i Warsawa og fekk eit innblikk i aktiviteten.

Omstilling

I 2006 har også vore eit år med mykje fokus på omstilling for næringslivet i Sogn og Fjordane. Innovasjon Norge har ansvar for å følgje opp og kvalitetssikre omstillingsarbeidet i Flora, Årdal, Høyanger, Vågsøy og Jølster.

Solcellefabrikk

Det er handsama fleire store og viktige saker for kommunane Årdal og Høyanger. Den største er solcellefabrikken Norsun AS som vil gi over 100 arbeidsplassar.

Positiv utvikling

Sogn og Fjordane står i 2007 overfor den positive utviklinga at alle kommunane er innlemma i området for distriktsvirkemidler. Men fylket har ikkje fått høgare rammetilskot, så utfordringa vert å få tildelte midler til å strekke til.

Godt år for næringslivet

Året 2006 har vore særs godt år for næringslivet i Sogn og Fjordane. Vi forventar i tillegg at veksten vil halde fram med full styrke i 2007. Men utviklinga har vore ulikt fordelt i fylket. Det er mange lokalsamfunn med svak nærings-utvikling og befolkningsnedgang. Det er difor viktig at det offentlege verkemiddelapparatet får rammer som kan vere med å løfte desse områda.

Mangel på arbeidskraft

Den største utfordringa for fylket er likevel mangel på arbeidskraft. 40 % av bedriftene i Sogn og Fjordane planlegg å utvide arbeidsstokken. Tilgangen på arbeidskraft kan vere med på å begrense veksten.

Styret i Innovasjon Norge i Sogn og Fjordane er samansett av fire kvinner og fire menn. 42 % av dei tilsette i administrasjonen er kvinner. Sjukefråværet i 2005 ved kontoret var på 2,8 %.

Samarbeidet mellom styret og administrasjon er godt, og styret takker administrasjonen og tilsette for godt arbeid og grundig førebudde saker.