Kundebedrifter frå Sogn og Fjordane
Innovasjon Norge i Sogn og Fjordane har vore med og finansiert ei
rekkje innovative prosjekt. Her vil vi presentere tre prosjekt
der vi har vore medverkande med ulike tenester.
Finden Gard
Bygdeutviklingsprisen 2006 i Sogn og Fjordane gjekk til Finden
Gard ved Laila Lilleøren og Lars Finden. Finden Gard er ein
veglaus gard nær inntil Stølsheimen landskapsvernområde, noko som
vert aktivt nytta som fortrinn frå vertskapet si side for å auke
inntektsgrunnlaget av garden. Staden er svært eksotisk og
interessa særleg frå bedriftsmarknaden er aukande.
I Norge har ein så langt i liten grad vore oppteken av å nytte dei
mange nasjonalparkane og andre verna område som ein ressurs i
næringsutvikling. Måten prisvinnarane nyttar vernestatus og
vegløyse i marknadsføring og profilering er til stor inspirasjon
og godt føredøme for andre med liknande utfordringar.
Norsun AS
Norsun AS er i gang med å gjennomføre betydelege investeringar i
Årdal i det som skal bli ein av verdas største fabrikkar for
monokrystallinske silisiumskiver. Monokrystallinske silisiumskiver
er laga av rein silisium og blir brukt til å lage energieffektive
solceller. Silisiumskivene skal seljast til aktørar i den
internasjonale solenergi-marknaden for vidareforedling til
solceller og solcellepanel. Produksjonsstart er planlagt til
tidleg i 2008.
Eit tilskot på 30 millioner kroner frå Innovasjon Norge inngår som
ein viktig del av ein samla finansieringspakke som sikrar
etablering av i første omgang 100 arbeidsplassar i Årdal.
Bionordic AS
Bionordic AS er eit bioenergiselskap i Jostedalen som gjennom dei
siste åra har utvikla den første norske pelletsovnen. Utviklingen
er gjort i nært samarbeid med SINTEF og designbyrået 360 grader
produktdesign AS.
Innovasjon Norge har delteke finansielt i alle fasane i samband
med utvikling av BioNordic AS sin pelletsovn. I 2006 ønskte
bedrifta å sjå nærare på den internasjonale marknaden. I den
samanhengen har Innovasjon Norge sine kontor i utlandet bidrege
med marknadssjekkar i Norden og Tyskland.